سفر دمشق
عراق سے روانہ ہونے کے بعد دمشق پہونچے، اور وہاں جامع مسجد دمشق میں آپ نے قیام فرمایا، رمضان شریف کا مبارک مہینہ آگیا، ماہ رمضان المبارک آپ نے وہیں گذارا، آپ جامع مسجد میں امامت بھی فرماتے رہے، یہاں نماز تراویح میں بڑا ہجوم ہوتا تھا، شہر کے بڑے بڑے علماء، فضلاء، صلحاء اور صوفیاء گوشے گوشے سے آپ کی اقتداء میں نماز پڑھنے کے لئے آتے تھے، کبھی کبھی ایک ہی شب میں پورا قرآن ختم فرمادیتے تھے، عام لوگ اتنی طویل نماز سے تھک جاتے تھے؛ لیکن تقریباً ایک سو عابد، زاہد، اہل اللہ اور اہلِ کمال آپ کی اقتداء میں تراویح پڑھتے اور اس قیام کو اپنی معراج سمجھتے اور کہتے کہ جس نے امام متقی کی اقتداء میں نماز ادا کی تو اس نے گویا نبی کے پیچھے نمازپڑھی، آپ نے اسی مسجد میں اعتکاف بھی فرمایا، یہاں رمضان المبارک کا عشرۂ آخر آپ کا عجیب عالم میں گذرا کہ خود آپ کو اپنا ہوش نہ رہا، جب عید کا چاند نکلا اور ہر طرف خوشیوں اور مسرتوں کی ہنگامہ آرائی ہوئی تو آپ عالم ہوش میں آئے اور فرمایا کہ رمضان المبارک کی ۲۰/ تاریخ سے مجھے ہوش نہ تھا، معلوم نہیں کہ اس درمیان نماز پڑھی یا نہیں؟ لوگوں نے عرض کیا کہ نماز کے کوئی آداب تک نہیں چھوٹے ہیں، آپ نے فرمایا الحمدللہ! میرا یہ وقت شیخ اکبر کی طرح ہے، جیسا کہ انھوں نے ”فتوحات مکیہ“ کے باب چالیس میں لکھاہے کہ ”ایک وقت ان پر ایسا گذرا تھا کہ وہ نماز پڑھتے تھے، امامت کرتے تھے، مگر ہوش نہ تھا۔>شد
اس مسجد میں ایک دن کچھ صوفی صفت لوگ آئے، اور اصطلاحاتِ صوفیہ وکلمات کے معنٰی ومفہوم پر بحث شروع کردی، جس کا مقصد کچھ سمجھنا نہیں؛ بلکہ اپنی قابلیت کا اظہار تھا، حضرت نے ان کو تسلّی بخش جوابات دئے اور فرمایا اے عزیزو! الفاظ توحید سے دھوکے میں مت پڑو، محض الفاظ کے جاننے سے توحید کا ادراک نہیں ہوسکتا، جب تک علائق زمانہ سے باہر نہ نکلو اور ریاضت شاقہ اور عبادت پسندیدہ سے مہذب نہ بنو، صرف الفاظ سے کھیلنے سے کوئی فائدہ نہیں؛ بلکہ وہ صفات اپنے اندر پیدا کرو تب معلوم ہوگا وحدت کیا چیز ہے؎
کار کن کار بگذار از گفتار
کاندریں راہ کار دارد کار
گفتگو چھوڑ کر عمل کرو اس لیے کہ راہِ معرفت میں عمل کی ضرورت ہے۔
For Contact Us
Go to Contact Page
or
Mail:contact@makhdoomashraf.com
Cal:+91-9415721972